KALIBO, Aklan—Napilitan nga magpaeupok it baril ro sangka pulis agud kunta nga magaserbing warning shot kontra sa sangka manugbulkit matapos nga gina-alegar nga gin-eagas ag ginhana imaw kara nga eampusan it tubo ag butong sa prente it anang vulcanizing shop sa kilid it national highway nga sakop it Brgy. Mambog, Banga.
Sa off-the-record interview, ginsaysay ni P/Corporal Ronald de Tomas, miyembro it Bomb Squad it Malay Municipal Police Station nga naka-deploy sa isla it Boracay nga matapos nga gindaea ro anang tricycle sa shop it suspek nga nakilaea kay Jerald Zonio, 38 anyos, residente it nasambit nga lugar hay nataeupangdan nga mainit eagi ro anang ueo.
Bangud kara, nakaangkon sanda it diskusyon, ag pagkatapos nga magpakilaea nga pulis hay ginasugid nga nagbo-oe it tubo ag butong ro biktima ag ginhana imaw nga eampusan.
Agud nga maprotektahan ro anang kaugalingon ag kaibahan nga asawa hay napilitan imaw nga magpaeupok it baril.
Natamaan sigon ro biktima sa anang tuo nga parte it tiyan rason nga insigidang gindaea sa Aklan Provincial Hospital.
Boluntaryo man nga nagsurender ro suspek sa mga rumespondeng katapo it Banga Municipal Police Station.
Ginasugid nga si Zonio hay may ginabatyag nga nervous breakdown.
Ginpahayag dugang nga igmanghud kara ro napatay nga si 2Lt. Junibert “Bert” Zonio, opisyal it Philippine Army Scout Ranger nga nauna eon nga ginbansagan nga baganihan matapos nga makipagbakbakan sa mga teroristang Bangsa Moro Islamic Freedom Fighters o BIFF sa probinsiya it Maguindanao ko hulyo 2018.
Ro insidente hay padayun nga gina imbestigahan it kapulisan.
