Kalibo Aklan —-Nagapangasubo ro pamilya it sangka marino bangud nga abo eon nga iga-uli raya sa probinsiya it Aklan .
Si Ronnie Ibabao Lorenzo, 52 anyos, Engine Storekeeper it sangka cruise ship ag residente it Brgy. Poblacion, New Washington hay namatay sa sangka ospital sa Uruguay bangud sa coronavirus disease 2019 (COVID-19).
Emosyunal nga ginsasay it anang igmanghud nga si Norlie Lorenzo ro nabatyagan it andang pamilya bangud sa gin-agihan it igmanghud antes raya nga nabugtuan it ginhawa .
Makabig sigon raya nga asymptomatic ko una ukon owa it anuman nga sintomas nga nabatyagan rason nga owa eagi ginpapanaog sa barko agud nga madaea sa ospital rason nga padayun pa ro anang komunikasyon kanda.
Apang makataliwan ro sang domingo hay gin-eagnat raya, naghigku it mabasa ag nabudlayan nga magginhawa rason nga ginbutangan it oxygen.
Nagtaliwan pa ro pilang adlaw hay nagtawag eon ro andang agency ag ginkumpirma ro anang pagkamatay sa ICU it sangka ospital sa Uruguay .
Ginasugid nga sangka Australyano sigon ro unang nagpositibo sa sakit, hasta nga ko ulihi hay nagkalhit eon raya sa haeos 60% it pasahero ag crew it barko hay apektado eon it impeksyon.
Masakit man sigon sa andang baeatyagon, apang pilit nanda nga ginabaton ro tanan .
Nagpabatyag sigon kanda tanan ro anang igmanghud nga medyu ro buot hambaeon hay ginapakalma sanda sa sitwasyun .
Eubus sigon sanda nga nagakanugon sa anang pagkamatay bangud nga makabig raya nga bread winner it andang pamilya .
Sa makaron hay presenteng naka freezer pa ro bangkay it anang igmanghud samtang naga-usoy pa it crematorium sa lugar.
Posibleng iga-uli ro anang abo pagkatapos it lockdown .
