KALIBO, Aklan–Eubos ro kalipay nga nabatyagan it sangka miyembro it Akeanon Bukidnon matapos nga makapasar sa kakatapos eamang nga Civil Engineer Licensure Examination.
Suno kay Engr. Eujin Cabes Tinong, Civil Engineer Passer ag tumandok it Brgy. Rosal, Libacao nga nagbunga ro tanan nga kalisod, sakripisyo ag hangkat nga anang ginpangutabang samtang naga-eskwela.
Nag-umpisa nga magpatigayun it online review si Engr. Tinong ko buean it Enero kung siin gin-aku kara nga nalisdan imaw nga mag-eagas sa mga leksyon sa unang daywang dominggo.
Apang, bangud sa pagtinguha ag determinasyon hay nahimo nana nga magpadayun hasta nga maipasa ro exam.
Ginpakigbahin man kara nga ro pinakayabe nana para matapos ro anang handom hay ro pag-angkon it “time management ag self-discipline”.
Mag-euwas kara, kinahang-ean man ro “focus” agud nga matun-an ro tanan nga leksyon bilang preparasyon sa nagahilapit nga eksaminasyon.
Si Engr. Tinong hay nagtapos sa Aklan State University (ASU)-Kalibo campus sa kursong Bachelor of Science in Civil Engineering ko Hulyo 27, 2020.
