Kalibo Aklan ————Patay ro sangka miyembro it LGBTQ+ community matapos nga gin-eabo bandang alas-9:20 kabie sa Brgy. Gibon, Nabas.
Ginkilaea ni P/Staff Sgt. Melvin Alba it Nabas PNP ro biktima nga si Ronnie Tamboon, 48-anyos, sangka parlorista, tumandok it probinsya it Mindoro apang presenteng nagaistar sa nasambit nga lugar.
Samtang ro suspek hay ginkilaea man nga si Reymund Salvador, 33-anyos it nasambit man nga lugar.
Sa inisyal nga imbestigasyon it Nabas PNP, halin it agahon nga nag-inuman ro daywa kaibahan ro iba pa nandang barkada nga nagresulta sa andang grabeng kahilungon.
Ginasugid nga nakaangkon it mainitan nga diskusyon sa magtimbang nga parte sa uwa pa matumod nga rason.
Nagsugid sigon ro suspek sa anang kaeapit-baeay nga gin-eabo nana ro biktima nga nakaangkon it fatal nga lastro sa leog ag iba pang parte it eawas nga nagresulta sa anang hinali nga kamatayon.
Sa follow up operation it pulisya, naaresto si Salvador ag insigidang gindaea sa taeatapan it pulisya kon sa siin imaw sa makaron nakakustudiya para sa nagakaigong disposisyon.
Ro insidente hay padayon pang ginaimbestigahan it Nabas Police Station.
