KALIBO, Aklan—Dead on arrival sa Aklan provincial hospital ro sangka motorista matapos nga masunggaban it van sa national highway nga sakop it Brgy. Linabuan Sur, Banga.
Ginkilaea ni Police Sergeant Elmar Relente it Banga Police Station ro biktimang si Rolando Tulio, 59-anyos ag residente it nasambit nga lugar.
Sa inisyal nga imbestigasyon it pulisya, paadto sa direksyon it Kalibo si Tulio kon siin pag-abot sa nasambit nga lugar hay umagaw sigon raya sa pihak nga linya it karsada rason nga agud masunggaban it pampasaherong van nga ginamanaho ni Julieses Fuentes, 52 anyos it Barangay Alacaygan, Banate, Iloilo.
Angot kara, insigidang gindaea sa ospital ro biktima apang gindeklarang patay eon it nagtatap nga doktor.
Samtang si Fuentes hay gilayon man nga ginhold it mga otoridad ag presenteng una sa andang kustudiya para sa nagakaigong disposisyon.
