KALIBO, Aklan—Dead on arrival sa Aklan provincial hospital ro sangka motorista matapos nga maimbolbar sa aksidente nga nag-eontad sa Brgy. Mataphao, New Washington.
Ginkilaea ni PSSgt. Mardicar Reyes it New Washington Municipal Police Station ro biktimang si Jonel Guarino, 50-anyos ag residente it Brgy. Jugas sa nasambit nga banwa.
Samtang, ro nakasunggaban kara nga traysikol hay ginamaneho ni Rodialdo Regenio, 70-anyos ag residente it Brgy. Jumarap, Banga.
Sa inisyal nga imbestigasyon it pulisya, uwa it alintro si Guarino kat naabutan it nagrespondeng miyembro it Municipal Disaster Risk Reduction Management Office ukon MDRRMO-New Washington kon sa siin gilayon man nga gindaea sa ospital apang gindeklarang patay eon it attending physician.
Nakitaan it fatal nga lastro sa ueo si Guarino nga tuga it aksidente nga nagresulta sa anang hinali nga kamatayon.
Samtang, ro aksidente hay padayon pang ginaimbestigahan it New Washington PNP Station para sa nagakaigong disposisyon.
