KALIBO, Aklan—Presenteng ginabueong sa intensive care unit it Aklan provincial hospital ro sangka motorista matapos nga sumunggab sa dump truck sa diversion road sakop it Brgy. Mina sa banwa it Lezo.
Ginkilaea ni PSSgt Eliser Dollosa, desk officer ag imbestigador it Lezo Municipal Police Station ro biktima nga si Jaime Concepcion, 47-anyos, sangka tanod ag residente man it nasambit nga lugar.
Samtang, ro driver it dump truck hay gin kilaeang si Ello Diaz, 40-anyos ag residente it Brgy. Santa Cruz sa nasambit man nga banwa.
Sa inisyal nga imbestigasyon it Lezo PNP Station, opposite direction ro magtimbang nga behikulo kon sa siin head on collision gid ro natabo nga nagresulta sa pag-angkon it lastro sa ueo ni Concepcion.
Sa pagpangusisa sa lugar, medyo may kadasigon sigon ro pagpamaneho it biktima sa anang motorsiklo kon sa siin pag-abot sa nasambit nga lugar hay inagaw kara ro linya it dump truck.
Gintinguhaan pa kunta nga malikawan it saeakyan ro motorsiklo apang naabot eon imaw kara.
Nataeopangdan nga una sa idaeom it impluwensya it aeak ro biktima kat matabo ro aksidente.
