Patay ro sangka motorista matapos nga sumunggab sa kasubeang kara nga truck sa national highway nga sakop it Linabuan Norte sa banwa it Kalibo bandang alas-8 kabi-e it pang-orason.
Suno sa pahinante it nasambit nga truck nga ginkilaea kay Rey Blanca nga mahinay ro andang pagpadaeagan kat nakibot eon lang sanda it anang driver kat gulpi eon lang nga sumunggab ro motorista sa printeng porsyon it truck.
Ginkilaea ro biktima kay Armiel Ilap, 35-anyos ag residente it nasambit nga lugar nga kung siin madasig sigon ro pagpadaeagan kara.
Insigida sigon sanda nga nanaog para sikyaron ro motorista ag nagtawag it nagakaigo nga bulig.
Sandig sa inisyal nga imbestigasyon it Kalibo Municipal Police Station nga maghalin sa direksiyon it Kalibo ro biktima ag paagto sa banwa it Banga.
Samtang, maghalin mat-a sa Capiz paagto sa banwa it Caticlan ro truck para magtabok sa may Mindoro para magdeliver it andang daea nga produkto.
Nasayuran nga una sa idaeom it impluwensya it makahieilong nga ilimnon ro biktima ag nakaangkon it fatal nga lastro sa may porsyon it anang ueo bangud sa owa raya it suksok nga helmet.
Sa pihak nga parte, temporaryong ginkustodiya it Kalibo PNP ro driver ag pahinante it truck para sa nagakaigo nga disposisyon
