KALIBO, Aklan—Binawian it hueam nga kinabuhi samtang ginabueong sa Aklan provincial hospital ro sangka motorista matapos nga maimbolbar sa sangka aksidente nga nag-eontad sa national highway nga sakop it Brgy. Tondog, Tangalan.
Ginkilaea it Tangalan PNP ro driver nga si Carlito Talidong, 53-anyos, tumandok it probinsya it Antique apang presenteng naga-istar sa Brgy. Baybay sa nasambit nga banwa.
Sa inisyal nga imbestigasyon it pulisya, halin sa Brgy. Baybay paadto it banwa it Makato ro biktima kat aksidente raya nga nahapit it 10 wheeler truck nga ginamaneho ni Nasario Leyte Jr., 54-anyos ag residente it Bacolod City, Negros Occidental.
Bangud sa mabaskog nga impact it pagkahapit hay natumba gid ro biktima nga gintunaan it anang mga lastro sa kaeawasan nga nagresulta sa anang hinali nga kamatayon.
Sa makaron ro truck driver hay una sa kustudiya it Tangalan Police Station para sa nagakaigong imbestiasyon ag disposisyon.
