KALIBO, Aklan–Sangka nagaka-agnas nga eawas it eaeaki ro nakit-an nga nagakueob sa suba sa Sitio Ilawod, Barangay Bakhaw Norte, Kalibo kaina it agahon.
Suno kay kagawad Freddie Andrade it nasambit nga lugar nga posibleng nagtabok sa suba ro biktima bangud sa nakitang bag sa anang likod.
Ginapatihan nga naeumos raya bangud nga owa man it nakitang anumang nina sa anang eawas.
Ginatantiya nga ap-at hasta limang adlaw eon nga naeumos ro biktima bangud sa nagalobo ag nagakaagnas eon ro anang eawas.
Sa makaron hay nagapadayun ro imbestigasyon ag pagtumod it otoridad sa pagkatawo it biktima.
Ginpasiguro man ni kagawad Andrade nga owa it naireport nga missing person sa andang lugar.
Sa pihak nga parte, ginpahayag ni Ramil Nerviol, sangka residente sa lugar nga samtang nagapalibanaw it siki sa suba kaibahan ro daywa nana nga igkampod kat makahugum it mabaho ag kat andang gin-usoy hay nakita ro bangkay sa tunga it kaarumahan.
Ro insidente hay insigidang gin-report sa andang barangay.
