Hugot nga ginpamalibaran it nanay ni alyas “Raprap” ro mga alegasyon sa anang onga it nauna eon nga nagdangop sa Bombo Radyo Kalibo nga si Feofilo Sabala para ireklamo ro nagpanakaw sa anang bag nga ginakeakipan it ginatantyang 80,000 pesos nga haega it gamit.
Suno kay Rodora Tenoso, residente it Brgy. Afga, Tangalan nga owa man raya it maipakita nga ebidensya nga nagapatumod nga ro anang onga ro nagboue sa anang gamit.
Bangud eamang sigon sa panaysayon ni certain “Renel” hay ro anang onga eon ro gindinuso ni Sabala angot sa nasambit nga insidente.
Ginapahayag nga ginkutana ni certain “Renel” ro anang onga kung naka-agto raya sa lugar kun siin naduea ro bag.
Gin-aku sigon it onga nga naka-agi raya sa nasambit nga lugar ag nakit-an ro bag apang para eamang sigon nga magpangahoy.
Umpisa sigon kato hay ginapamilit eon ni Sabala nga ro anang onga ro naghimu it pagpanakaw.
Raya hay sa pihak nga owa man kara nakit-an ro mismong itsura it suspek.
Angot kara, ginpamalibaran man ni Tenoso nga gina-apinan sanda it Kapitan it Brgy. Afga bangud sa owa sigon raya kat nag-atubang sanda sa barangay hall para sa paghusay.
Ginpahayag dugang ni Tenoso nga mabahoe ro bulig it anang onga sa andang pamilya bangud sa mabuligon, mahugod ag owa raya nagabarkada nga klase it onga.
Panawagan kara kay Sabala nga siguraduhon anay ro mga mabug-at karang alegasyon sa anang onga bangud sa mabahoe sigon kara ro naging epekto sa anang onga nga nagatuon ag sangka menor de edad paeang.
