KALIBO, Aklan—Arestado ro sangka negosyante sa ginkasa nga drug buy-bust operation it Philippine Drug Enforcement Unit ukon PDEU Aklan sa Brgy. Bulwang, Numancia.
Ginkilaea ni PMaj. Frensy Andrade, head it PDEU-Aklan ro suspek nga si Manolo Cenon, 53-anyos ag residente it Brgy. Tamalagon, Tangalan.
Narekober sa posisyon ag control it suspek ro daywang ka sachet it suspected shabu kabaylo it P3,000 nga buy bust money.
Suno kay PMaj. Andrade, ginsubaybayan nanda ro suspek matapos nga nakabaton it impormasyon nga nagaduso raya it illegal nga droga ag nagahalin pa sa ibang probinsya.
Angot kara, nag-apela ro otoridad sa publiko nga inde gid mag-intra sa illegal nga droga bangud nga may posibilidad nga masamad ro andang kaugalingon ag bilog nga pamilya.
Samtang sa pihak nga parte, gin-ako it suspek nga ana mismo ro narekober kana nga droga.
Apang, ginpamalibaran kara nga nagabaligya imaw sa baylo hay nagagamit eamang sigon raya.
Dati eon imaw nga nakulong bangud man sa illegal nga droga apang temporaryong napahilway matapos nga naka-avail sa plea bargaining.
