KALIBO, Aklan—Dismayado ro sangka negosyante matapos nga ginbitbit it owa nakilaea nga persona ro anang ginpamartida nga pagagamiton kunta sa andang mga iga-eaha nga baligya sa andang restaurant business nga nahamtang sa banwa it Numancia.
Suno sa tagreklamo nga si Anita Jimenez, insigida imaw nga nagdangop sa Kalibo municipal police station matapos ro insidente.
Gin-aywan sigon nana ro anang mga ginpamakae nga nakabutang sa karton sa guwa it sangka baealigyaan it RTW sa guwa it Kalibo public market matapos nga may malipatan pang bak-eon.
Sanay eon sigon imaw nga gina-aywan anay sa nasambit nga lugar ro anang mga karga apang sa owa ginaeauman hay ginbo-oe raya it sangka babaye.
Nasayuran nga sa pag-review sa CCTV, ro babaye nga nagbo-oe hay ginatantiya nga may kataason nga 5’3 hasta 5’4, medyu chubby, nakasuksok it violet nga t-shirt ag naka-shorts.
Nagsakay sigon raya sa sangka tricycle ag gina alegar nga nagpanaog sa Roxas Avenue ag nagsakay eon man sa sangka van.
