KALIBO, Aklan—Nagpaandam ro sangka negosyante sa mga pumueoyo nga maging alerto sa tanan nga kahigayunan eabi eon kung nagabaton it kwarta maghalin sa mga tawo nga bukon it personal nga kilaea.
Raya hay matapos nga sangkiri eon lang mabiktima si alyas “Inday” nga sangka negosyante it mga RTW ukon boutique ko adlaw it Lunes kung siin may daywa ka mga persona nga nagpakunu-kunu nga magabakae it short apang peke ro daea nga mga kwartang papel.
Ginabuebanta nga 5’6 ro kataason it mga nasambit nga persona, kasarangan eamang ro pang eawason ag moreno ro kulay it panit kamana man nga masami nga may suksok nga shade, kaeo ag Aklanon ro ginagamit nga lenggwahe.
Una sigon nga ginbayad kana hay P1,000 peso bill apang owa raya it sensilyo rason nga nagtao ro suspek it P500 bilang pambayad sa worth P100 nga short.
Madasig sigon nga nagpaeagiw ro mga suspek kat matueopangdan it negosyante nga peke ro gindawat nga kwarta.
Ginhana pa raya eagson ni alyas Inday apang madasig nga naka-eskapo sakay it sangka motorsiklo nga owa it nakabutang nga plate number.
Sa mayad nga swerte suno kana hay una ro anang amiga rason nga owa madayun ro hana kunta nga pag-holdap kana it mga suspek.
