KALIBO, Aklan–Nagpaandam ro sangka negosyante sa publiko kontra sa sangka modus nga nakapangbiktima it pilang mga sari-sari store sa banwa it Kalibo.
Daywang ka baraka ro ginasugid nga nabiktima it sangka owa nakilaea nga persona sa barangay baybay Andagao Kalibo.
Modus sigon it suspek nga nakasakay sa motorsiklo, naka-helmet ag naka-face mask nga nagabantay it mga establisimento nga owa ro tag-ana.
Nagapaeapit sigon ro suspek sa bantay ag ginahambae nga may balanse nga baeayran ro tag-ana it baraka.
Suno kay Roda Bautista, sangka negosyante nga naboe-an sanda it 500 pesos matapos nga gindali-dali ro anang 14-anyos nga unga it suspek nga naghambae nga may kueang pang baeayran ro anang ina sa ginbakae nga bugas.
Apang antes sigon imaw nga nabiktima, sangka tag-ana man it baraka sa andang unahan ro naloko matapos nga bitbiton it suspek ro andang sangka tunga sa sako nga bugas nga baligya bangud nga may utang sigon nga bugas ro tag-ana ag kinahangean nana nga mabayluhan.
Kaeabanan sigon nga naga atake ro suspek sa aeang-aeang nga oras nga owa ro tag-ana ukon nagapahuway.
Ginasugid nga ro suspek hay mataas , maniwang , aklanon speaking, may dark complexion ag naga-isaeahanon eamang nga nakasakay sa motorsiklo.
Nagaeaum sanda nga pinaagi sa pag-review sa mga CCTV footage hay matumod ro pagkatawo it suspek.
