KALIBO, Aklan–Plano makaron it sangka negosyante nga i-surrender sa gobyerno ro sambilog sa anang koleksyon nga taklobo ukon giant clam nga ginapatihan nga nagakahaeaga it pilang milyong piso.
Suno kay alyas “Sony”, sangka negosyante it native products sa probinsya it Aklan nga nakita ag ginbakae nana ro nasambit nga taklobo sa probinsya it Romblon masobra tatlong dag-on eon ro nagtaliwan.
Raya hay may maputi nga kulay ag medyo may kabug-aton ro timbang.
Nagka-interes sigon sa taklobo matapos nana raya nga maagyan nga nakakalhit sa mga kilid it kabaeayan.
Ko una sigon hay plano nana raya nga ibutang sa aquarium apang kat masayuran nga nagabalor it mabahoe nga kantidad hay nagdisidir imaw nga itago anay raya para i-surrender sa gobyerno.
Owa sigon imaw nagka-interes nga ibaligya ro taklobo.
Si alyas “Sony” hay mahilig nga magkolekta it mga antigong bagay ag kwarta.
Masami sigon nana nga ginasumbilan ro mga resort it anang baligya nga native products.
