KALIBO, Aklan–Sangka negosyante sa Kalibo Public Market ro panibag-ong biktima it peke nga 1,000 peso bill.
Suno sa biktimang si Elminora Zonio-Castro nga sa mayad nga swerte ag nakilaea nana ro customer nga nagbayad kana it peke nga kwarta.
Ginsaysay kara nga suki nana si certain joy sa anang baligya nga saging rason nga natandaan nana ro anang itsura ag naseparar ro kwarta nga ginbayad kana nga kapin sa P1,600 pesos.
Kat makaangkon it komprontasyon, naakig pa sigon kana si certain Joy ag gin-insister nga bukon it fake money ro anang ginbayad.
Sa pag-atubang sa Kalibo municipal police station, gin-aku it babaye nga biktima man imaw it nasambit nga pekeng kwarta.
Matapos suno kana ma-detect nga peke ro anang ginabuytan nga kwarta hay ginbakae nana raya it pilang kilong saging halin sa biktima.
Matapos nga makaangkon it settlement, ginbayluhan it babaye ro ginbayad nga pekeng kwarta kadungan ro pag-atras sa reklamo kontra kana.
Nasayuran nga mag-eowas sa biktima, may iba pang negosyante ro nagguwa ag nagreklamo nga biktima man sanda it pekeng kwarta ko royun nga adlaw.
Sa pag-usisa sa kapin sa 3,000 pesos nga nakumpiskang fake money nga ginaeakipan it daywang 1,000 peso bill ag daywang 500 peso bill, natukiban nga paeariho ro gina angkon kara nga serial number.
Sa makaron hay padayun nga ginatumod it mga otoridad kon sin-o ro sa likod it nagapakalhit it pekeng kwarta sa tindahan.
