KALIBO, Aklan—Nag-angkon it sangka lastro sa likod ro sangka eaeaki matapos nga ginbuno it anang ka-boardmate sa bahin it Capitol Site, Brgy. Estancia, Kalibo.
Nakilaea ro biktima nga si Luisito Zonio alyas Buknoy, tumandok it Brgy. Ortega, Libacao samtang ro suspek hay nakilaea nga si Wilmar Nacor, 21-anyos, tumandok it Brgy. Calamcan sa nasambit nga banwa.
Suno sa sambilog nga boardmate it magtimbang nga parte nga nag-inuman ro suspek ag biktima sa bahin it Lambingan beach kung siin may natabo sigon nga owa mailaan ni Nacor matapos raya nga pagtripan it mga barkada it biktima.
Bandang alas-6:00 sigon it gabi-i kat nag-uli ro suspek ag gina-usoy kara ro biktima apang owa nana raya makita rason nga naghueat imaw maeapit sa gate it andang boarding house.
Ginapahayag nga gulpi eamang nga ginbuno it suspek sa likod ro biktima kasunod it pagpanaog kara sa ginsakyan nga tricycle.
Gilayon man nga gindaea sa Aklan Provincial Hospital ro biktima para sa nagakaigo nga pagbueong.
Samtang, ro suspek hay temporaryong nakakulong sa Kalibo Police Station matapos nga boluntaryong nagsurender kasunod it insidente.
Si Nacor hay magapangatubang sa kasong frustrated murder.
