KALIBO, Aklan—Nag-organisa man it community pantry sa banwa it Kalibo ro sangka non-profit organization nga Movement of Gratitude, ro grupo nga ginbilog ko Abril 1,2020 nga nagatuyong makabulig sa publiko sa tunga it padayun nga pakikipagsukoe sa pandemya tuga it COVID-19.
Suno sa adviser it grupo nga si Maria Solita Guzman nga owa eamang nanda gintukod ro nasambitan nga community pantry agud nga makisabay sa uso kungdi agud nga mabuligan ro mga nagakinahangean makarun nga tyempo it krisis.
Dugang pa kara nga ro andang proyekto hay indi maging pabug-at sa health sector bangud hugot karang ginapatuman ro mga health protocol agud mapabilin nga euwas ro publiko sa paeag it deadly virus.
Naging inspirasyon man it grupo ro community pantry nga gintukod sa Maginhawa Street sa Quezon City.
Target man nanda nga magpadayun ro andang proyekto hasta nga matapos ro pandemya ag una pa sa gihapon ro bulig ag suporta it mga pomoeuyo.
Samtang ginpahayag man it reigning Miss Kalibo Ati-atihan Festival 2021 nga si Cherry Mae Regalado ag sambilog man sa mga myembro it Move Gratitude nga bilang sangka beauty queen hay mabahoe nga opurtunidad para kana nga makaibahan sa grupo ag makapaabot it bulig sa mga Kalibonhon ag sa mga Aklanon nga nagakinahangean it andang bulig.
