Kalibo Aklan ——Bilang sangka nurse nga nakikipagsukoe sa coronavirus disease (COVID-19) sa Canada, nagahimo it extra precautionary measure ro Akeanon nga si Yolly Punzalan, tubong banwa it Makato ag presenteng naga-istar sa Canada.
Suno kana nga bangud nga may anang mga maintok nga unga rason nga madahan imaw sa kada naga-uli sa andang baeay agud nga indi makadaea it virus.
Ginasigurado sigon nana nga kon naga-duty sa ospital nga gina-obrahan hay nakasuksok imaw it Personal Protective Equipment ag antes nga magsueod sa baeay hay naga-ilis it eambong ag nagapaligos .
Gina-disinfect man sigon nana ro tanan nga mga gamit halin sa guwa antes nga ipasueod sa andang baeay.
Sa pihak nga parte, ginsaysay pa ni Yolly nga kon amat hay naga-extend imaw it anang duty hours eabi eon kon indi makasueod eagi sa trabaho ro anang ibang kaibahan nga nurse.
Makaron hay ginakueang eon sigon sanda it staff ag pila sa anang mga katrabaho hay naka-experiensiya eon it mental panic matapos nga sambilog sa andang kaibahan hay nagpositibo sa sakit .
Nasayuran nga pati ro retirement home makaron sa Canada hay naka lockdown agud nga maprotektahan ro mga Senior Citizens nga kaeabanan nga ginatamaan it sakit.
