KALIBO, Aklan–Nabalian it siki ro sangka Overseas Filipino Worker (OFW) nga kakauli pa eamang halin sa ginatrabahuhan nga nasyon matapos nga masunggaban it motorsiklo nga ginamaneho it sangka manugturo sa Brgy. Cabangila, Altavas.
Base sa inisyal nga report, samtang nagahueat it anang sueang sa kilid it karsada ro biktima nga si Armenia Dela Vega, 41-anyos, residente it Brgy. Camanci, Batan hay gulpi eamang imaw nga nabungguan it motorsiklo nga ginamaneho ni Bryan Mejiya, sangka Public School Teacher ag residente it Brgy. Linayasan, Altavas.
Nataeopangdan nga una sa idaeom it impluwensya it makahieilong nga ilimnon si Mejiya kat matabo ro insidente.
Unang gindaea ro biktima sa Altavas District Hospital apang gilayon man nga ginsaylo sa pribadong ospital sa banwa it Kalibo.
Ro biktima hay nag-angkon it pila ka mga lastro sa eawas ag nabalian it siki samtang si Mejiya hay nag-angkon man it pilang lastro.
Ro motorsiklo nga gingamit it manugturo hay presenteng una sa kostudiya it Altavas Municipal Police Station para sa nagakaigo nga disposisyon.
