KALIBO, Aklan–Pabor ro sangka Overseas Filipino Worker (OFW) sa ginaduso it pilang ka mga mamalidha it Pilipinas angot sa eubusan nga pagpatuman it deployment ban sa Kuwait.
Suno kay Bombo International Correspondent Dennis Rata ag presenteng nagatrabaho sa Kuwait nga dapat sigon sundon anay it gobyerno ro proseso ag siguraduhon nga mai-serbi anay ro nagakaigo nga hustisya sa biktima nga si Jullebee Ranara.
Matapos sigon ro natabo kay Jullebee ag iba pang mga OFW nga naging biktima it pagpangmaltrato ag abuso sa Kuwait hay tyempo eon para maghimu it aksyon ro gobyerno ag taw-an it hugot nga igtueopangud ro nasambit nga isyu.
Tyempo eon man sigon it pag-amyenda sa presenteng bilateral labor agreement it Pilipinas ag Kuwait para man sa kaeuwasan it tanan nga Pilipino sa nasambit nga nasyon eabi eon ro mga domestic helpers.
Ginpahayag dugang nga kinahangean magpatigayon anay ro gobyerno it hugot nga background check sa kada employer antes ipadaea ro sangka empleyado.
Bangud may pilang ka mga employer sigon nga kaeakip sa blocklist apang nagagamit it ibang pangaean para makaboue it panibag-ong kabulig.
Sa pihak nga parte, bangud sa maabo nga mga Pilipino ro posibleng maapektuhan it nasambit nga ban dapat sigon nga magplastar ro gobyerno it mga kondisyon angot kara para masiguro nga maprotektahan ro mga OFW.
Madumduman nga karumaldumal ro gindangatan ni Ranara sa alima it 17-anyos nga onga it anang amo nga suspek sa paghimueos, pagnabdus, pagligsa it daywang beses ag pagpilak sa anang eawas sa sangka disyerto sa Kuwait.
