Kalibo Aklan —————-Sangka Overseas Filipino Worker nga ginasugid nga naka-experiensiya it depresyon ro nagapangayo it bulig agud nga maka-uli eon sa Pilipinas.
Pinaagi sa anang magueang nga si Cecelia Sagon, nagdangop ro pamilya sa Bombo Radyo Kalibo agud nga ipaabot ro sitwasyon it anang manghud nga si Maria Teresa Reyes it Barangay Bakhaw Norte, Kalibo ag presenteng nagatrabaho bilang domestic helper sa nasyong Oman .
Suno kay Cecelia nga indi nanda malikawan nga magkabaeaka sa kahimtangan it anang manghud eabi pa ag nagpahayag raya nga gusto eon nana nga magpakamatay.
Mag-eowas sa depresyon hay nalisdan man raya sa anang ginsudlan nga trabaho.
Nagpangayo man sigon sanda it bulig sa Public Employment Services Office ukon PESO-aklan ag sa recruitment agency .
Ro OFW nga haeos tatlong buean pa eamang sa trabaho matapos nga nagpanaw raya ko nobyembre 26, 2021 hay sa poder makaron it sister company it agency sa nasambit nga nasyon ag gina-alegar nga ginapigos imaw ag ginboe-an it cellphone.
Nagdesisyon sigon raya nga magtrabaho sa ibang nasyon matapos nga engganyuhon it recruitment agency kamana man nga mapursige ro pagtuon it tatlong mga unga nga puro maintok pa .
Baeo eon sigon raya matapos nga mamatay ro anang mister sa sangka aksidente.
Samtang, ginpasiguro man ni Overseas Workers Welfare Administration ukon OWWA-6 welfare case officer Jack Arroyo nga paga-obrahon nanda ro tanan agud nga maka-uli si Reyes.
Apang nagpaandam raya nga medyu maeawig raya nga proseso .
Uman kara nga ginpadumdum sa mga nagaplano nga magtrabaho bilang domestic helper sa ibang nasyon nga pag-isipan raya it makapilang beses .
