KALIBO, Aklan—Sangka padre de pamilya ro nagdangop sa Bombo Radyo Kalibo agud nga magpangayo it bulig pinansiyal para sa hospital bill it anang panganay nga bag-ong unga nga eapsag.
Suno kay Niño Magat it barangay Estancia, Kalibo nga nakaangkon it blood infection ro anang unga, kun sa siin, gin-eagnat raya it todo daywang adlaw matapos nga gin-unga it anang asawa.
Bangud nga kritikal ro anang kundisyon, napilitan sanda nga i-admit raya sa sangka pribadong ospital agud nga insigidang maisueod sa neonatal intensive care unit.
Gindugang pa ni Magat nga makaron hay una eon sa eowas nga kahimtangan ro anang unga ag pwede eon sanda nga makaguwa it ospital, apang problema nanda ro mabahoe nga hospital bill nga naga-abot sa kapin sa 100,000 pesos.
Bangud sa pirme nana nga pag-absent sa pag-asikaso sa anang bag-ong unga nga misis ag nagamasakit nga unga, naduea-an imaw it trabaho nga nakadugang pa sa anang problema.
Samtang, pilang mga akeanon nga may mabinueawanon nga tagipusuon ro nagpaabot it bulig pinansiyal matapos nga mabatian sa bombo radyo ro anang panawagan partikular ro sikat nga Vlogger nga si Ka-pobreng Archie Hilario.
