KALIBO, Aklan — Uman nga nagpadumdum ro kapulisan nga pirmeng magdahan sa pagmaneho ag pagbiyahe agud nga malikawan ro disgrasya .
Raya ro ginpahayag ni P/Executive Master Sgt. Fe Rebaño, tagapaghambae it New Washington Municipal Police Station kasunod it pagkamatay it sangka padre de pamilya nga nakataeana kunta nga magasueang sa anang misis halin sa anang trabaho sa banwa it Kalibo.
Madumduman nga dead on arrival sa Aklan Provincial Hospital ro driver it tricycle matapos nga sumunggab sa nakaparada nga kapareho nga behikulo sa Sitio Dum-eog, Brgy. Tambak, sa banwa it New Washington, bandang alas-6:15 gabi-i it Miyerkules.
Nakaangkon it patal nga lastro sa ueo ro biktima nga si Joseph Lora, 40-anyos, sangka security guard ag residente it Sitio Tugbungan, Brgy. Pook, Kalibo matapos nga inapok sa anang ginamaneho nga tricycle.
Suno sa mga nakasaksi nga masyadong madasig ro pagpadaeagan it biktima rason nga posibleng owa eon kara napan-uhan ro naka-park nga behikulo.
Halin sigon raya sa Brgy. Polo ag nagapaagto sa banwa it Kalibo kat matabu ro aksidente.
