KALIBO, Aklan—Owa eun it kabuhi kat masapwan ro sangka ama matapos nga nagbigti-patay sa sangka boarding house maeapit sa Kalibo-Numancia bridge partikular sa N. Roldan Street Barangay Poblacion Kalibo.
Ginkilaea ro biktimang si Leonardo Kianco, 55-anyos, tumandok it Brgy. Naile, Ibajay apang presenteng naga-istar sa nasambit nga lugar.
Suno sa onga it biktima nga si Jobert Ilejay, patay eun kat andang napan-uhan ro anang ama nga nagbitay sa anang kwarto gamit ro sangka cable wire.
Ginsaysay pa kara nga umpisang nagmasakit ro anang ama hay owa eun nanda raya ginpasugtan pa nga magtrabaho.
Samtang may nakit-an man nga suicide note maghalin sa biktima kon sa siin ginpahayag kara nga owa eun imaw naila pa nga maging pabug-at sa anang pamilya rason nga nagdesisyon eun lang raya nga utason ro anang kaugalingong kabuhi.
Nasayuran nga ro biktima hay nadiagnosed nga may sakit nga tuberculosis ukon TB ag kapin sa tatlong dag-on eon nana raya nga ginabatyag matapos nga nana gintapusa ro medikasyon.
Sa pihak kara, kon may problema ka nga ginaangkon ag gusto mo it kaistorya, pwede kang magtawag sa National Center for Mental Health Crisis Hotline (NCMH-USAP) sa numero nga 0917-899-USAP (8727) ukon sa 7-989-USAP (8727) kamana man sa Hopeline PH 24/7 hotline numbers nga 0917-558-4673; 0918-873-4673 ukon 2919.
