KALIBO, Aklan—Aminado si Barangay Kapitan Ramil Pelayo it Baybay, Makato nga may sangka magpamilya nga nag-uli sa andang barangay, tatlong adlaw antes nagpatuman it granular lockdown sa C. Laserna Street, Brgy. Poblacion sa banwa it Kalibo.
Suno kana, tumandok it andang barangay ro mga nasambit nga persona ag naga-board eamang sa C. Laserna bangud sa andang trabaho.
Nagkasugot sigon sanda it mga barangay council nga bantayan ag ipaidaeom sa 14 diyas nga home quarantine ro mga raya kaibahan ro iba pa nandang miyembro it pamilya bangud naghalin sanda sa area nga may nailistang kumpirmadong kaso it COVID-19.
Engkaso sigon nga may una pa nga mag-uli ukon magbalik sa andang baryo hay indi eon nanda raya pagbatunon agud nga maproteksyonan kontra sa paeag it COVID-19 ro iba pa nandang pumueoyo.
Raya sigon nga tikang hay bilang pagdahan para sa kaeuwasan it anang nasakupan bangud nga nakalista eon it local transmission ro probinsya it Aklan.
