KALIBO, Aklan—Mag-eowas sa diskriminasyon nga naeksperiensiyahan, ginreklamo man it sangka pamilya ro hospital bill it sambilog sa andang miyembro matapos nga makipagsukoe sa COVID-19.
Ginpahayag it tiya it 14 anyos nga covid survivor nga umabot sa masobra sa 300,000 pesos ro andang ginbayaran sa sangka pribadong ospital iya sa banwa it Kalibo.
Suno kana nga ko mayo 23 hay nakaexperiensiya it “on and off” nga eagnat ro anang gumankon hasta nga ko ulihi hay inatake raya it anang sakit nga rheumatic heart anemia disease rason nga nabudlayan eon nga magginhawa.
Hunyo 9, gindaea nanda raya sa sangka private hospital ag ginpaidaeum sa rapid test kun sa siin hay nagpositibo sa deadly virus.
Agud nga makumpirma, nagpaidaeum pa gid raya sa RT-PCR test ag nagpositibo man rason nga ginpa-isolate sanda nga bilog nga pamilya.
Uman sigon sanda nga nabutang sa grabeng pagsubok matapos nga matapnan ro bilog nanda nga pamilya nga ginaeakipan it pitong miyembro.
Maskin nga asymptomatic, gindaea sanda sa quarantine hotel para sa mandatory nga 14 days nga quarantine period.
Samtang, matapos nga ma-discharge sa ospital ro andang pasyente, nakibot man sanda sa mataas nga sukot eakip ro masyado kanaba nga bawas sa andang philHealth nga naga abot eamang sa 14,000 pesos.
Ginareklamo man nanda kon ham-an nga owa nakabutang sa hospital billing it andang pasyente nga nagpositibo raya sa COVID 19.
Sa pihak nga parte, ginreklamo man nanda ro ginhimo nga diskriminasyon it mga tawo sa andang barangay maskin nga gindeklara eon sanda tanan nga nagmayad sa COVID-19.
