KALIBO, Aklan — Nabutang sa peligro ro kabuhi it an-um nga miyembro it sangka pamilya matapos nga gulping nahugos ro sangka parte it bukid bandang alas-11:00 gabi-i it Lunes, Oktubre 14 sa Sitio Mapait Brgy. Aranas, Balete.
Base sa report, natabu ro insidente kasunod it mabaskog nga pagbubu it uean.
Makita sa video nga ginpakigbahin ni Marrol Mhalov nga ginpanghakot it pamilya ro andang mga importanteng gamit sa guwa matapos nga ro mabahoe nga portion it andang baeay hay natabunan it nahugos nga eapok.
Bangud sa landslide, nasamad ro baeay ag nadaeasa pati ro tatlong motorsiklo.
Ginkumpirma ni Punong Barangay Maria Lonie Rebenito nga owa man it naninahan sa landslide kat insigidang nakaguwa ro mga tawo halin sa andang baeay.
Ginsaysay it MDRRMO-Balete, sa sueod it andang baeay ro magkapamilya nga hamuok nga nagakatueog kat makabati it matsa nagahagunos kun sa siin nahugos eon gali ro mataas nga parte it eugta sa likod it andang baeay.
Insigidang ginpang-pukaw ro mga inunga agud nga magguwa sa kusina nga parte it andang baeay.
Makita man sa mga litrato ro kahalitan nga gintuga matapos nga dumausdos paubos ro mga kasagingan ag iba pang tanum.
May nakita man nga pilang gil-ang sa ibang parte it bukid nga makabig eon nga delikado.
Ginapatihan nga bangud sa mga mabaskog nga pag-uean rason it paghumok it eugta.
Sa makaron hay naga-usoy it masayluhan nga lugar ro apektadong pamilya nga ginpa-istar eamang it tag-ana it eugta sa nasambit nga lugar.
