KALIBO, Aklan—Gina-istoryahan makaron ro gulpiyadang pag-uepad it mga kagamitan sa sueod it panimaeay it sangka pamilya sa banwa it Libacao.
Ro insidente hay nagtuga it kakueba ag pagkabaeaka sa natungdan nga pamilya matapos nga magkaeapusa ro bote it softdrinks halin sa andang baraka ag pagkalhit it bugas sa saeog kun siin makit-an pa ro hurma it alima it indi pa matumod nga elemento.
Suno Kay Mr. Raffy Nahil, dating volunteer reporter it Bombo Radyo Kalibo ag makaron hay sangka manugbueong nga sambilog imaw sa gintawgan it pamilya para magpangayo it bulig.
Natabo sigon ro insidente ko gabi-i it Lunes kun siin insigida imaw nga nag-adto sa lugar.
Samtang nagahimo sigon it ritwal hay nakasub-eang kara sa ikaywang paeapag it baeay ro sangka itom nga kapre.
Gin-eambaring sigon imaw kara it tsinelas kun siin inigo imaw sa anang abaga.
Suno kay Nahil, naka-istar sa mabahoe nga puno it camansi sa likod it baeay it pamilya ro nasambit nga kapre.
Ginakaakig sigon kara ro pag-eaha it pamilya maeapit sa puno bangud naga-adto idto ro asu rason nga ginpakita kara ro kainit it anang kaakig.
