KALIBO, Aklan—Ginbuligan it Municipal Disaster Risk Reduction Management Office ukon MDRRMO-Banga nga mai-bakwit ro sangka pamilya nga gina-alegar nga na-trap sa sangka maisot nga isla sa katung-anan it banwang Banga ag Lezo kahapon, adlaw it Lunes.
Base sa report, ginakaeakipan raya it mag-asawa kaibahan ro andang ap-at nga dag-on ag sang dag-on nga unga kamana man ro sambilog pa nandang unga nga dalagita.
Ro nasambitang magpamilya hay naka-istar sa sangka payag sa maintok nga isla nga nahamtang tunga it suba sa nga sakop it Brgy. Cerrudo, Banga.
Nasayuran nga may baeay mat-a sa takas ro nasambitang pamilya apang nakasanayan eon nandang magkatueog idto sa payag kung gabi-i.
Owa sigon nanda ginaeauman nga magbaskog ro pagbuhos it uean nga daea it bagyong Quinta rason nga na-trap sanda ag ginkinahang-ean nga i-rescue.
Sa pihak nga parte, amat-amat man nga nagtaas ro tubi sa Aklan river sa bahin it C. Laserna Street, Kalibo kahapon matapos nga ginpaidaeom sa tropical cyclone warning signal no. 1 ro probinsya it Aklan bangud sa pagpanaeasa it bagyong Quinta.
