KALIBO, Aklan—Sangka pamilya sa banwa it Numancia ro sangkiri nga mabiktima it stray bullet sa selebrasyon it pagsug-aeaw it bag-ong dag-on.
Sa Facebook post ni Herwin Antonino, ginsaysay kara nga bumanda ro nagtaeang nga bala it kalibre 22 sa pwertahan ukon screen door sa likod nga parte it baeay it anang igmanghud.
Sa follow-up investigation it Bombo Radyo Kalibo, ginpahayag ni Herbeth Antonino Vargas, tag-ana it baeay ag residente it Brgy. Laguinbanua East, Numancia nga ro bala hay nakita it anang unga bandang alas-8 kaina it agahon samtang nagahugas it alima.
Mabahoe ro andang pagpati nga maeapit eamang sa andang baeay ro nagpaeupok it baril.
Sa pihak kara, mabahoe man ro andang pagpasaeamat bangud nga owa it may tinamaan it nagtaeang nga bala.
Ro insidente hay ginpa-blotter eon sa Numancia Municipal Police Station ag presente nga gina-imbestigahan kun siin ag kanyo naghalin ro bala.
Sa inisyal nga pag-usisa, tadlong ro daeagan it bala halin sa gunman ag owa naghalin sa ibabaw.
Tumama pa sigon ro bala sa sangka puno it saging antes nga umigo sa andang screen door.
Sa pihak nga parte, ginpahayag ni Laguinbanua East, Numanccia Punong barangay Lalaine Tan nga may tatlong indibidwal ro gin imbitahan sa police station para sa nagakaigo nga imbestigasyon.
Raya hay ginaeakipan sigon it unga it andang barangay tanod ag mga naka-inuman kara nga barkada kabi-i.
Mag-eowas kara sangka slug it bala ro narekober sa baeay it anang tanod nga kaeapitbaeay it pamilya Vargas.
Nag apela man imaw it kooperasyon sa imbestigasyon.
