KALIBO, Aklan–Sangka menor de edad ro madinaeag-on nga naaresto ko mga miyembro it Kalibo PNP sa ginpatigayon nga follow-up operation angot sa panakawan nga nag-eontad sa sangka spare parts establishment sa may bahin it Concepcion St. Kalibo.
Una kara, nagparecord sa taeatapan it pulisya si Rhea Ismael, 40-anyos ko nagtaliwan nga adlaw kon sa siin ginasugid kara nga ro andang benta nga nagaabot sa P30,000 pesos nga nakasueod sa pouch ag nakabutang sa idaeom it lamesa hay nadiskubrehan nga naduea.
Dikara eon naalarma ro tagreklamo rason nga insigidang nagparecord sa Kalibo PNP para maimbestigahan ro insidente.
Antes pa man kara hay may sangka pamatan-on nga nagdaea it anang bike sa shop agud nga magpaayos kon sa siin permi raya nga nagapinangutana hasta nga ko ulihi hay uwa eon raya nakabalik.
Sa ginpatigayon nga investigation ag follow up operation it mga otoridad, natukiban nga ro nasambit nga 13-anyos nga binatilyo ro responsable sa nasambit nga panakawan.
Narekober sa anang posisyon ag kontrol ro P17,000 pesos nga cash ag iba pang spare parts.
Ro nasambit nga binatilyo nga ginakabig nga children in conflict with law ukon CICL hay ginturn-over sa taeatapan it Department of Social Welfare and Development ukon DSWD para sa nagakaigong disposisyon.
