KALIBO, Aklan—Sangka panibag-ong kaso eon man it beta variant ro uman nga nadetect sa probinsya it Aklan.
Raya hay base sa ginpaguwa nga press release it Department of Health Western Visayas kahapon nga adlaw.
Nakabaehag nga base sa resulta it Whole Genome Sequencing nga ginpaguwa it University of the Philippines-Philippine Genome Center nga ko July 28, kabilugang 15 ka sample ro gintest nga positibo sa Alpha (B.1.1.7) variant nga ginakaeakipan it pito maghalin sa probinsya it Antique; ap-at sa Iloilo City; daywa sa Iloilo Province; ag tig-sambilog maghalin sa Capiz ag Negros Occidental.
Samtang, 22 ka samples ro positibo sa Beta (B.1.351) variant nga ginakaeakipan it 16 maghalin sa Iloilo Province; tig-daywa maghalin sa Iloilo City ag Capiz kamana man tig-sambilog sa Aklan ag Negros Occidental.
Mag-eowas kara, ap-at nga iba pang samples nga nagatumod sa rehiyon sais ro positibo sa P.3 variant nga ginakaeakipan it tig-sambilog maghalin sa Iloilo City, Bacolod City, Guimaras ag Iloilo Province.
Bangud kara, sigidas makaron ro pakikipag-angot it ahensya sa mga natungdan nga LGU’s agud nga makapatigayon ro mga raya it contact tracing sa mga nakasalamuha it nasambit nga mga pasyente.
Uman nga nagpadumdom ro mga health expert sa publiko nga ugaliong magsunod sa ginapatuman nga minimum health protocols para sa kaeowasan it tagsa-tagsa ka pamilya.
