KALIBO, Aklan–Padayun pang gina-imbestigahan it New Washington Municipal Police Station ro insidente it panakawan sa sueod it sangka panimaeay sa bahin it Brgy. Jugas, New Washington.
Ro baeay hay ginapanag-iyahan it mag-asawang Librada Limtaw nga presenteng naka-base sa Malolos, Bulacan.
Ginpahayag it caretaker it pamilya nga si Helen Bautista nga ko adlaw it dominggo hay maayos pa ro baeay apang pag-agi nanda ko Lunes hay napan-uhan kara nga bukas ro purtahan.
Sa andang pag-usisa, nakakalhit eon ro mga gamit sa saeog ag bukas ro purtahan it mga kwarto.
Ginapatihan nga natigayon nga mabuoe it mga suspek ro amplifier bangud nga owa eon it sueod ro karton kara.
Ginpahayag dugang nga insigida sandang nakipag-angot sa gumankon it pamilya Limtaw nga sangka manugturo para ipahisayod ro hitabo kamana man nga nagtawag sa mga kapulisan.
May kaangtanan kara, nagapabilin pa nga blangko ro pamilya kung sin-o ro responsable sa insidente.
Suno kay Lucila Resco, gumankon it tag-ana it baeay nga mabahoe ro andang pagpati nga pwersahan nga ginsueod it mga suspek ro baeay gamit ro tigib.
Haeos samad-samad eon sigon ro pilang kagamitan ag bukas pa ro cabinet sa sueod it kwarto it anang tiya.
Bukon sigon it raya ro unang kahigayunan nga ginhana nga sudlon ro nasambit nga baeay.
Nasayuran nga masami nga owa it tawo ro baeay bangud nga kung amat rayag gina-ulian it pamilya.
