KALIBO, Aklan—Kapin sa 50,000 pesos ro gin-aywan nga danyos it nag-eontad nga sunog sa sangka panimaeay sa Sitio Alimatok, Brgy. New Buswang, Kalibo.
Suno kay FO1 Mark Jerome Mabacquiao it Bureau of Fire Protection ukon BFP-Kalibo, nakabaton sigon sanda it tawag bandang alas-10:40 kaina it agahon angot sa sunog nga nagtuhaw sa panimaeay nga ginapanag-iyahan ni Mrs. Jenny Garais.
Nag-umpisa sigon ro kaeayo maeapit sa aircon sa sueod it kwarto it biktima.
Sa mayad nga swerte hay insigidang nakaguwa ro mga tawo sa sueod it panimaeay kamana man nga madasig nga natapna it Bureau of Fire ro sunog.
Ginapahayag nga nakaangkon it partial damage ro panimaeay matapos nga mag-eapta sa kesami ro kaeayo ag naabot ro tatlong kwarto ag iba pang gamit it pamilya.
Ginapatihan nga substandard ro gingamit nga extension wire it pamilya rason nga owa raya makasarang ag nagresulta it sunog.
Bangud kara, nagpadumdom si FO1 Mabacquiao sa mga pumueoyo nga likawan ro paggamit it mga substandard nga extension wire sa sueod it baeay agud mapaeayo sa peligro ukon sunog.
