KALIBO, Aklan—Naabo ro sangka panimaeay matapos nga gin-eamon it kaeayo sa Brgy. Agcawilan, Lezo.
Suno kay P/Cpl. Elliser Tolliosa it Lezo PNP, natabo ro insidente bandang alas-7:12 kabie kon sa siin ro bilog nga pamilya hay nag-adto sa birthday party sa andang kaeapit baeay.
Ro nasambit nga panimaeay hay ginapanag-iyahan nanday Mr. Mark ag Mrs. Mary Joy Tagua kon sa siin uwa gid sanda it nasalbar nga kagamitan pati ro andang paeay nga bag-ong tubas hay uwa gid sanda it nahakwat matapos nga mabahoe eon ro kaeayo kat anda raya nga nataeopangdan.
Nagbuhay ro sunog it haeos sang oras kon sa siin nagdeklara it fire-out ro Bureau of Fire Protection (BFP) Numancia bandang alas-8:50 it gabie.
Ro nasambit nga panimaeay hay human sa light materials ag ginatantya nga kapin sa 15,000 pesos ro naging danyos it sunog.
Samtang, padayon pang ginatumod it BFP-Numancia ro gintunaan it nasambit nga sunog.
Sa pihak nga parte, uman nga nagpadumdom ro otoridad sa publiko nga antes aywanan ro andang panimaeay hay siguruhon nga uwa it mga nakasaksak nga kagamitan, uwa it nakasindi nga mga kandila ag eabi sa tanan, i-off ro switch it kuryente.
