KALIBO, Aklan—Kapin sa P2,500 ro nailistang danyos matapos masunog ro sangka panimaeay sa Brgy. Torralba, Banga.
Suno kay F01 Mark Jerome Mabaquiao nga nakabatun it tawag ro andang taeatapan maghalin sa Municipal Disaster Risk Reduction Management Office (MDDRMO) sa banwa it Banga matapos ro nagtuhaw nga sunog sa sangka panimaeay nga himo sa light materials ag ginapag-iyahan it mag-asawang nakilaea kanday Maricel Espiritu ag Ar-Jay Teodosio.
Ginapahayag dugang nga sa sandang pag-abot sa lugar hay ugdaw eun ro kaeayo.
Ginapatihan nga bangud sa naaywanan nga baga sa andang pagihaw-ihaw ro naging rason it sunog.
Kasamaran man sa kusina ag pilang parte it andang bubong ro gin-aywanan nga halit kara.
May kaangtanan kara, uman nga nagpadumdom si F01 Mabaquiao sa publiko nga maghaeong sa tanan nga oras agud malikawan ro kapareho nga insidente.
Kung maggamit it uling sa pag-eaha hay indi raya pag aywanan kung bukon it sigurado nga patay eun ro kaeayo.
Antes man suno pa kana nga magpanaw sa panimaeay hay gabuton ro tanan nga nakasaksak agud mapaeayo sa insidente.
