KALIBO, Aklan–Nagakasubo makaron ro sangka pamilya matapos nga masunog ro andang panimaeay ko Sabado it aga-aga sa Sitio Bang-bang, Brgy. Calizo, Balete.
Suno sa tag-ana it baeay nga si Denoso De Juan nga antes natabo ro sunog hay naka-eksperyensya anay sanda it makapilang beses nga pagpaeong-sindi it iwag.
Bandang alas-12:00 it aga-aga suno kana kat nag-umpisa ro kaeayo sa atop nga porsyon it andang kusina kung siin ginapatihan nga halin raya sa wiring it kuryente.
Insigida sigon nana nga gin-adtunan ro anang 94 anyos nga ina para daehon sa euwas nga lugar ag ro anang manghod nga may deperensya sa paminsaron.
Madasig sigon nga nag-eapta ro kaeayo bangud nga medyo may kabaskugon ro huyop it hangin.
Haeos tanan sigon nga gamit nanda sa sueod it baeay hay nasunog kaeakip ro ap-at nga sakong paeay.
Samtang, nagpanawagan man si De Juan sa mga may binueawanon nga tagipusuon nga mabuligan ro andang pamilya nga nagapangutabang sa grabeng kalisod bangud sa natabo nga sunog.
Sa pihak nga parte, nagapadayun pa ro imbestigasyon it Bureau of Fire Protection (BFP)-Balete angot sa natabo nga sunog.
Suno kay FO2 Jose Marie Torre it BFP-Balete nga padayun ro andang pagtipon it impormasyon para matumod ro ginhalinan it kaeayo.
Ro nasunog nga baeay hay himo sa mixed materials kung siin ginabuebanta nga naga-abot sa P120,000 ro estimated damage.
