Kalibo Aklan—– Kapin sa 500,000 pesos ro danyos nga gin-aywan it nag-eontad nga sunog sa sangka panimaeay sa Brgy. Biga-a, Malinao.
Ginkilaea ro tag-ana it baeay nga si Eugenia Galicha, sa legal nga edad ag residente it nasambitang lugar.
Base sa inisyal nga imbestigasyon it BFP-Numancia, nag-umpisa ro sunog bandang alas 10:17 kabi-i.
Ginasugid nga owa sa andang baeay si Galicha kat matabo ro sunog bangud idto sigon raya nag-eubog sa sambilog pa nandang baeay nga kapin sa 30 metro ro eayo sa ginkatabuan it sunog.
Ro naaywan sigon sa baeay hay ro anang gumankon nga si Jerwin Javid.
Antes nagtuhaw ro insidente hay nagcharge it anang cellphone si Jerwin kung sa siin matapos nana nga magcharge hay naaywanan karang nagapabilin nga nakasaksak sa saksakan ro anang gingamit nga charger.
Raya sa makarun ro ginapanan-aw nga rason ukon ginhalinan it kaeayo.
Gilayon pa sigon nga tapnaon ni Jerwin ro sunog apang owa nana raya masarangan bangud madasig nga nag-eapta ro kaeayo.
Sa pag-abot it mga katapo it Bureau of Fire Protection hay totally burn eon ro nasambitang baeay.
