KALIBO, Aklan—Bangud sa mabaskog nga sueog ag pagtaas it lebel it tubi sa Aklan river, natigayun nga mahueog sa suba ro sangka panimaeay kaibahan ro sangka poste it Aklan Electric Cooperative (Akelco) sa bahin it Brgy. Casit-an, Libacao.
Suno kay Punong barangay Alicio Zonio Zubista it nasambit nga lugar, bangud sa na-ekperyensyahan nga pilang ka mga pagbaha rason nga amat-amat nga natiphag ro eugta sa kilid it Aklan river.
Ro nahueog sigon nga baeay hay ginapanag-iyahan it anang pangatlong unga nga si Alvin Zubista.
Ginkabuligan pa sigon nanda raya nga salbaron apang masyadong mabaskog ro sueog it tubi.
Ginasugid nga masobra 100 meters ro distansya it natungdan nga baeay ag poste it kuryente sa suba apang madasig nga ginkabkab it tubi ro eugta.
Bangud sa hitabo, temporaryo sanda nga nawad-an it suplay it kuryente umpisa ko gabi-i it Lunes.
Insigida sigon nanda nga ginpahisayod sa pamunuan it Akelco ro hitabo kung siin madasig man raya nga gin-aksyunan.
Base sa pinakaulihing monitoring naging matawhay eon man ro sitwasyon sa Aklan river.
