KALIBO, Aklan—Totally burned ro sangka panimaeay matapos nga masunog sa nabukid nga porsyon it Brgy. Ambulong, Batan.
Suno kay Barangay kagawad Aldes Dela Vega it nasambit nga lugar nga natabo ro sunog bandang alas-5:20 kaina it aga-aga.
Ro nasambit nga baeay hay ginapanag-iyahan it 84-anyos nga si nanay Milagros Silverio Marcelino.
Ginasugid nga ro mismong apo nga kaibahan sa sueod it baeay ni nanay Milagros ro nakapan-o sa hitabu.
Nag-umpisa suno kana ro kaeayo sa kwarto it anang apo partikular sa nakasab-it nga mosquitero.
Ginapatihan nga nag-eanay ro ceiling fan nga nakasaksak sa sueod it kwarto.
Pag-abot sigon ni kagawad Dela Vega sa lugar hay haeos paugdaw eon ro kabilugan nga bubong it baeay.
Gintinguhaan pa sigon it mga residente nga tapnaon ro sunog apang ulihi eon ro tanan.
Owa man it naisalba nga maskin anong kagamitan ro pamilya bangud sa madasig nga pag-eapta it kaeayo.
Maskin ro fire truck it Bureau of Fire Protection (BFP) hay owa man naka-eusot sa lugar bangud sa malisod nga daean.
May kaangtanan kara, nagpanawagan man si Kagawad Dela Vega it bulig para sa uman nga pagbangon it pamilya Marcelino.
