KALIBO, Aklan–Nakataeana nga pagadaehon sa sangka hospital sa syudad it Iloilo ro pitong dag-on nga unga matapos nga masunggaban it L300 van sa national highway nga sakop it Brgy. Man-up, Altavas.
Ginkilaea ni PMSgt. Tony Dy it Altavas PNP ro biktimang si Cedric Lenard Panganiban ag residente it nasambit nga lugar.
Samtang, ro van driver hay ginkilaeang si Carlito Serano Go, sa legal nga edad ag residente it Sebaste, Antique.
Ginasugid nga nagatabok ro biktima kaibahan ro ana nga lola kat gulpi eamang raya nga nasunggaban van nga nagabyahe halin sa Dumarao, Capiz paadto sa probinsya it Antique.
Si Panganiban hay nakaangkon it lastro sa ueo ag lipong gid raya nga nadaea sa Aklan Provincial Hospital para sa nagakaigong pagbueong.
Samtang, temporaryong ginkustudiya sa Altavas Police Station ro driver ag nagpromisa nga magabulig sa hospital bills it nasambit nga onga.
