LOCAL News — Mataas nga gradong 95 ro gintau ni dating Sangguniang Panlalawigan member ag political analyst sa Aklan nga si Atty. Harry Sucgang kay Presidente Ferdinand Marcos Jr., sa mga ginplastar kara nga mga accomplishments ag promises halin sa anang bag-o eamang natapos nga ika-tatlong State of the Nation Address ukon SONA.
Raya hay tuga sigon it anang naging desisyon ag panindugan angot sa mga nagapangunang isyu makaron, ro bagina sa tunga it Pilipinas ag China bangud sa mga gina-agawan nga teritoryo sa West Philippine Sea ag ro pag-ban sa Philippine Offshore and Gaming Operations ukon POGO.
Dugang pa ni Atty. Sucgang nga maskin may gina-ganar ro ekonomiya sa mga POGO hub, apang nakakasamad man raya sa imahe it Pilipinas bangud sa maeapnagon nga krimen kapareho it kidnap for ransom, extortion, corruption, scamming ag iba pa.
Ro hugut nga panindugan ag desisyon sigon ni Marcos angot sa WPS ag POGO hay patama raya kay Duterte nga hayagan nga maka-China.
Kadungan kara, gindayaw man nana ro Presidente sa anang mga accomplishment pag-abot sa food security mag-eowas eamang sa presyo it bugas nga owa nana masyadong ginpadaeman bangud nga posibleng na-realize sigon nana nga medyu mabudlay gid man nga maabot ro anang campaign promise nga obrahon nga P20 ro kada kilo it bugas.
Sa pihak nga parte, mataeupangdan sigon nga ro mga nag-standing ovation ag nagpalakpak sa mga SONA it administrasyon ni dating Pangueong Rodrigo Duterte nga pumabor sa POGO hay sanda man gihapon ro nagpakita it suporta makaron kay Presidente Marcos Jr., nga nagmandu sa pag-ban kara.
Normal eamang sigon ro makarondaya nga scenario sa pulitika.
