KALIBO, Aklan—Nagapati si Dr. Malyn Villanueva, sangka political analysts sa aklan nga ro US ro dapat nga basueon sa natabu nga pag-atake it Russia sa Ukraine.
Suno kana nga ro US ro nagpa-init sa gulo pinaagi sa pagsoesoe sa Ukraine nga magsueo sa North Atlantic Treaty Organization ukon NATO.
Ginpahayag nga ginkaakig ni Russian president Vladimir Putin ro ginaduso nga NATO expansion maeapit sa andang teritoryo nga makatuga it peligro sa andang seguridad kamana man ro ginhimo nga pagpamaeag it US.
Mataeupangdan suno kana nga kon siin may nagakatabu nga giyera hay nakikisawsaw ro amerika.
Gina-obra eamang sigon nanda nga battleground ro nasambit nga mga nasyon para sa andang kaugalingon nga interes.
Sa pihak nga parte, may posibilidad man sigon nga tuearon it China ro naging aksyon it Russia sa Ukraine sa pagbawi sa gina angkon nanda nga Taiwan.
Sangka pamaagi sigon agud nga mapundo ro pag-grabe it giyera ag pagtaas it numero it mga namatay hay ro pagpatunga it United Nations Organization, apang posibleng magaeawig pa it pilang dinag-on.
Dating magkaibahan sigon ro Ukraine ag Russia sa idaeum it sangka bandera it United Socialist Soviet Republic ukon U.S.S.R, bagay nga bumagsak ko 1991 sa pagpanumbalik it kapitalismo idtu.
