KALIBO, Aklan—Arestado ro 9 nga personalidad kaibahan ro sangka punong barangay sa ilegal nga bueang sa ginpatigayon nga operasyon it Madalag Municipal Police Station sa Brgy. Medina, Madalag, hapon it Domingo, Mayo 19, 2024.
Suno kay P/Capt. Jason Mausig, hepe it Madalag PNP nga bandang ala-1:15 it hapon naaresto ro mga suspek nga aktong nagahampang it ilegal nga bueang sa nasambit nga lugar sa ginkasa nga anti-illegal gambling operation.
Nakumpiska sa lugar ro 18 nga buhi nga manok nga pangbueang, tatlo nga patay nga manok nga pangbueang, mga paraphernalia ag bet money nga nagabalor it kapin sa P550.
Ginpahayag dugang nga sangka impormante ro nagsugid sa kapulisan nga may nagakatabu nga ilegal nga bueang sa lugar rason nga insigidang naghimo it aksyon ro mga awtoridad .
Sa masobra sa 200 nga katawo sa lugar, waeo ro naaresto kun sa siin ro pinakamagueang hay naga-edad it 74 ag ro pinakabata hay 46 anyos.
Bangud nga nakita ro presensiya it 36 anyos nga punong barangay, gin-aresto raya sa anang baeay may 500 hasta 700 metros ro kaeayu-on halin sa lugar kun sa siin ginpatigayon ro illegal cockfighting .
Ginpasakaan ro mga suspek it kasong pageabag sa Presidential Decree 1602 ukon Anti-Gambling Law, apang nabasura bangud sa kakueangan it mabakod nga ebidensiya.
Sa pihak kara, ginkumpirma ni P/Capt Mausig nga nagahueat eon lang sanda it mandu halin sa piskalya para sa uman nga pagpasaka it kaso pinaagi sa regular filing.
Nasayuran nga kan-o eamang hay nagsarado ro cockpit arena sa lugar bangud sa kawad-an it permit to operate.
Samtang, uman nga nag apela ro opisyal sa mga pumueuyu nga ipahisayod sa kapulisan kon may makita nga illegal nga hilimuon sa andang natungdan nga lugar.
