KALIBO, Aklan—Matapos bawion ro ginpatuman nga enhanced community quarantine sa Barangay Balabag ag surgical lockdown sa 2 purok sa Barangay Manocmanoc sa isla it Boracay, ginpaidaeum man makaron sa daywang domingo nga surgical lockdown ro Purok 1 it Barangay Yapak epektibo huwebes it aga-aga.
Suno kay punong barangay Hector Casidsid, magabuhay ro lockdown hasta sa Abril 28, 2021, apang pwede pa raya nga mapatag-od depende sa magiging resulta it swab test it mga nakasalamuha it mga nagpositibo sa virus.
Haeos 10 nga pamilya sigon ro nakaangkon it positibong kaso rason nga ginmandu nanda nga indi anay paguwaon ro mga residente.
Owa man suno kana it mga hotel ag resorts nga apektado bangud nga residential area ro lugar.
Dugang pa ni Casidsid nga nagapatigayon sanda makaron it hugut nga health protocols, agresibong contact tracing, testing ag isolation agud nga mapugngan ro pagkalhit it deadly virus.
Ginapatuman man ro curfew umpisa alas-11 it gabi-i hasta alas-4 it aga-aga.
Kadungan kara, ginapahaum man nanda ro distribusyon it food packs nga ginaeakipan it tunga sa sako nga bugas ag mga delata.
Sa pinaka-ulihing case bulletin it Malay Inter-Agency Task Force, may una nga 195 nga kaso it COVID-19 ro banwa it malay kun sa siin 49 pa kara ro aktibong kaso.
