KALIBO, Aklan—Dismayado ro sangka Public Utility Vehicle (PUV) driver nga nagabyahe sa banwa it Altavas matapos nga owa raya makabaton it cash assistance halin sa Land Transportation Franchising and Regulatory Board (LTFRB).
Suno sa tagreklamong si Mr. Jose Melanie Payba, nagakangawa imaw matapos nga maduea ro andang pangaean sa listahan it mga makabaton it nasambit nga ayuda.
Kapin sa 6,000 pesos sigon ro ginatao nga bulig-pinansyal it ahensya para sa mga driver nga naapektuhan ro paeangitan-an kasunod it pagpanaeasa it Coronavirus Disease 2019 ukon COVID-19.
Suno kana, ro mga kwalipikadong magbaton it ayuda hay ro mga driver nga nag-attend it seminar sa LTFRB kung siin ginakinahang-ean eamang sigon nandang ipakita ro ID nga gin-isyu kanda.
Apang, kat tyempo nga gina-claim eon kunta nana ro ginaeauman nga kantidad hay ginpamalibaran imaw it taga DSWD Altavas bangud owa sigon ro anang pangaean sa listahan.
Nasayuran nga gintugyan it ahensya sa mga natungdan nga Local Government Unit (LGU) ro budget para sa programa kung siin ro DSWD ro magapanguna sa pagpanupod kara.
Kumbinsido man ro tagreklamo nga bukon it halin sa LTFRB ro buyot nga listahan it taeatapan.
Raya hay matapos nga makit-an kara ro pilang pinaea-an.
Samtang, ginpanindugan man sigon it DSWD nga indi pwedeng makabaton ro mga driver nga miyembro it 4Ps ag nakabaton it Social Amelioration Program (SAP).
