KALIBO, Aklan–Arestado ro sangka eaeaki matapos ro ginpatigayun nga raid it Numancia PNP sa sangka panimaeay sa Brgy. Laguinbanwa West, Numancia.
Raya hay may kaangtanan sa iligal nga paghupot it armas it subject person nga si John Rey Laurente, residente it nasambit nga lugar.
Narekober it mga otoridad ro kalibre 38 nga baril, eskupita ag pilang ka mga bala sa sueod it baeay.
Hugut man nga ginpamalibaran ni Laurente nga imaw ro nagapanag-iya it nasambit nga baril ag bala.
Samtang, aminado man raya nga may dati eon imaw nga kaso apang natigayun nga man ma-dismissed.
Gin-insister pa kara nga planted ro narekober nga baril bangud nasayuran sigon nana ro laye angot sa legal ag iligal nga paghupot it armas bangud dati imaw nga reservist.
May kaangtanan kara, ginpaathag ni Punong Barangay Alvin Nabor nga may naging rekord eon sa andang barangay si Laurente bangud sa paghuyo kara it baril sa anang tiyo.
Masami sigon nga kontra kara ro anang mga paryente.
Samtang, ginpamilit man it Numancia PNP nga lehitimo ro andang ginkasa nga operasyon pinaagi sa ginserbi nga search warrant sa suspek.
Suno kay PSSgt. Felizardo Navarra nga mabuhay eon nanda nga gina-monitor si Laurente.
