KALIBO, Aklan—Ginreklamo it sangka residente ro pamunuan it andang Municipal Disaster Risk Reduction and Management Office ukon MDRRMO-Makato bangud sa gina-alegar nga kawad-an it driver it andang ambulansiya.
Suno sa tagreklamo nga si Johnny Piano it banwa it Makato nga nagsala eon sanda matapos nga malipong ro anang manghud sa sobrang taas it eagnat.
Naghinyu sigon sanda it bulig agud nga madaea eagi sa ospital ro andang pasyante apang ginpamalibaran kadungan ro paghambae nga idtu sa “warangan ro andang driver”.
Bangud kara, ginsakay eon lang nanda sa tricycle ro anang manghud agud nga insigidang mataw-an it atensyong medikal.
Natukiban nga ro sakit it anang manghud hay urinary tract infection ukon UTI nga gin-refer man sa out patient department matapos nga mataw-an it nagakaigo nga pagtratar.
Samtang, ginpamalibaran ni Allan Pelayo it MDRRMO-Makato ro alegasyon it tagreklamo.
Sa anang pag-imbestiga sa andang team nga naka-duty kahapon, may ginrespondehan sigon sanda ag may gindaea nga pasyente sa provincial hospital ko rato nga pang-orason.
May nagakaigo sigon sanda nga ebidensiya nga magapamatuod kara.Sa pihak nga parte, nagpangayo gihapon imaw it pasaylo sa pamilya piano sa natabu nga insidente.
